 |
أول مرة شفت الصورة استخفيت وانا أحاول أصيد الحل، وانقهرت يوم دريت الحل مو بذيك البساطة.
أول شي شوفوا الصورة وحسبوا جم واحد فيها، بعدين نطروا عليها 10 ثواني علما تتحرك وردوا حسبوا مرة ثانية شوفوا جم واحد صاروا:
شلون زاد العدد واحد بس بتحريك أجزاء الصورة؟!
الحل مو بسهالة اني اقول "ترى هالشخص كان منخش هني" وتنصاد السالفة، الحل يبيله شوية مخمخه.
بأشد اختصار الحل: الشخص الإضافي يتكون من تجميع أجزاء من كل شخص بالصورة.
شخص ينقص من راسه شوي، وشوي من خصر واحد ثاني، وشوي من وجه واحد، وشوي من ريول واحد، والأجزاء تتحرك من شخص لي شخص إلى أن يتكون شخص إضافي يكون الثالث عشر في الصورة.
حدد شخصية في الصورة وركز عليها، شوف يوم تتغير الصورة شنو ينقص منه، ورد ركز على شخصية ثانية وثالثة ورابعة ليما أخير شي راح تلاحظ يوم تكون الصورة 12 شخص وتتحول 13 ينقص من الشخصية المحددة جزء معين ويروح مكان ثاني.
الكلام بروحه ما يدش الراس ذاك الزود، عاد عشان تقتنع أكثر تعال شوف هذي صورة تقارن بين الأشخاص في الحالتين:
وهذا خوش فلاش يشرح الموضوع، اسحب الدائرة وحرّكها وشوف شلون يتغير عدد الأشخاص وراح تفهم الحركة أكثر:
إذا أبي أشرح الموضوع بتفصيل شوي راح اقول كل شخص ينقص منه جزء بنسبة 1/12 وينتقل لشخص ثاني، والشخص الثاني هم يضيف الجزء من عنده على الجزء من الشخصية اللي قبله ويحوّلها على اللي بعده، …إلىىىىىى أن يصير عندك شخصية كاملة يديدة. من جذي يوم يكونون 12 الشخصيات تكون أطول بشكل واضح منهم يوم يكونون 13!
تفصيل الأجزاء اللي تتوزّع وتنتقل بين الصورتين:
الشعر: الشخصية رقم #1 – ينتقل إلى -> الشخصيتين رقم #1 و #8
الوجه: الشخصية رقم #4 – ينتقل إلى -> الشخصيتين رقم #4 و #11
الأذرع: الشخصية رقم #2 – ينتقل إلى -> الشخصيتين رقم #2 و #9
الجذع: الشخصية رقم #9 – ينتقل إلى -> الشخصيتين رقم #9 و #5
الخصر: الشخصية رقم #5 – ينتقل إلى -> الشخصيتين رقم #5 و #12
الأرجل: الشخصية رقم #12 – ينتقل إلى -> الشخصيتين رقم #7 و #12
الأقدام: الشخصية رقم #10 – ينتقل إلى -> الشخصيتين رقم #6 و #13
يعني كل شخصية قاعدة تنقل جزء منها وتشاركه مع شخصية ثانية عشان بالأخير تتجمّع الشخصية الإضافية رقم 13.
الحركة اللي تخلي استيعاب الخدعة صعب هو لخبطة ترتيب الشخصيات، ما حطهم بسطره وحده يم بعض، وزّعهم بشكل عشوائي يخليك تدوخ وانت تدور هذا وين راح وهذا من وين طلع 
