 |
إذا ما تدرون أنا أدري! 
والموضوع مو غش تجاري أو جعاصه نفس ما تتوقعون.
السالفة هذي نلاحظها أغلب الوقت في أكياس البفك/البطاط بس موجودة حتى في أكياس الكورن فليكس، بعض أنواع الككاوات الصغيرة اللي تنباع بكيس، بعض المواد الغذائية المجمدة…الخ بس انا راح اركّز عالبفك من حبّي له 
هالحركة يسمونها "تعبئة الثقب الأسود" – Black-hole Packaging، اللي تشوفون فيه مساحة كبيرة فاضية داخل المنتج، والتغليف أو العلبة تعطيك انطباع بكمية كبيرة وايد أكثر من الموجود داخل 
. عكسها بالضبط حركة "الشرنقة الذهبية" – Golden Cocoon اللي يطفحون العلبة من المنتج لي آخر نَفَس.
بشكل عام حركة الثقب الأسود يعتبرونها صورة من صور الغش التجاري في السوق وممنوعة قانونياً، إلااااااااا اللهم إذا كان في سبب مقنع لهالنوع من التغليف ويخدم غرض معقول 
.
خلّصنا وقول السبب ليش اللعانة؟ ليش ما يترسون الكيس كله!؟
1- أحد ممثلي شركة فريتو لاي – Fritolay المشهورة اللي تصنع بفك ليز – Lay's قال انهم يحطون هوا في الأكياس عشان يحافظ على البفك وما يتكسّر في عمليات التصنيع على أحزمة النقل والتغليف. وهم بعد التصنيع لما ينقلون الأكياس للجمعيات هالهوا يمنع الضغط على البفك ويحافظ عليه إلى أن يوصل لرف الجمعية أو البقالة. حتى يحافظ عليه وانت تاخذه بشغف وتحطه بكل حب في عربانة الجمعية وبعدين وانت ما تدري تحط عليه أغراض الدنيا من كيس بصل أو علب بيبسي أو كولوركس وشامبو وعلب الفول والحمص…الخ هالأغراض كلها ممكن تحوّل البفك بودره من الضغط لو مو الهوا هذا موجود.
2- الحركة هذي هم تساعد المصنع يتأكد من توفر مساحة كافية بين المنتجات وبين جهة إغلاق الكيس، إذا كانوا يترسون الكيس لمستوى عالي احتمال كبير كل شوي جهاز التغليف يعلّق على بو حبّة بفك صارت بالنص وما صكّرت الكيس عدل.
3- الهوا يمنع فتح الأكياس مع تغيرات الضغط أثناء عملية النقل والشحن. مرات شاحنات البفك أو الطيارات تمر بمناطق يتغير فيها الضغط الجوي بالارتفاع والانخفاض، واذا كان الكيس مليان عالآخر ومافيه هوا ممكن ينفتح التغليف في حال مروا على منطقة ضغطها العالي مرتفع.
4- هالسبب من عندي واشوفه منطقي من خلال تجربة صارت معاي، يقدرون يستفيدون من هالموضوع لضبط وضمان الجودة – Quality Control، عشان تقدر تصيد الكيس المفتوح أو اللي فيه مشكلة بالنظر بسرعة. مرة كنت آخذ أكياس كتكو ولا انتبه في كيس من اللي شلتهم مفشوش 
جيكت عليه ولا اي والله الكيس شكله مصكّر بس مافيه هوا، سيده قطيت الكيس وخذيت غيره. إذا كان مو مصكّر عدل يمكن تدش فيه أدخنة وحشرات وحاجات مالها داعي 
.
يمكن هالأسباب ما تكون مقنعة وايد للبعض وانا ما الومهم، حتى انا اعتقد ان الشركات لاعبينها عالمستهلكين ومقللين الكمية أكثر من اللازم ببعض المنتجات، مع هذا هم حلو تعرف شالسالفة وتكون فاهم الوضع 
هالموضوع ذكّرني بموضوع ثاني حطيته من قبل عنوانه طريقة عملية لإغلاق كيس البطاط (البفك)، اللي يبي يجيكه حياه الله.
ولنفس الغرض هذي صورة اختراع لتصكير أكياس البفك اسمه iTouchless bag Re-sealer:
تقدرون تحصلونه من موقعه الرسمي على هالرابط وسعره عالموقع بعد الخصم حوالي 18 دولار أمريكي للقطعتين، يعني حوالي 5 دنانير 
.
